Në përvjetorin e 22-të të ngjarjeve të 17 marsit 2004, në veri të Mitrovicës u mbajtën homazhe pranë monumentit Engjëlli i Bardhë, afër urës mbi lumin Ibër. Ceremonia u organizua nga Komuna e Mitrovicës së Veriut dhe mblodhi qytetarë serbë, përfaqësues të udhëheqjes komunale si dhe të Listës Serbe.
Burime raportuan praninë e ish-pjesëtarëve të strukturave të sigurisë serbe, MUP. Gjithashtu, u vunë re 3 ose 4 ish-pjesëtarë të Policisë së Kosovës, të cilët kishin dhënë dorëheqje nga pozitat e tyre në 2022. Disa prej tyre kishin mbajtur role udhëheqëse, si komandant statcioni dhe shef i operativës.
Veton Elshani, zëvendësdrejtor i Drejtorisë Rajonale të Policisë për Veri, konfirmoi pjesëmarrjen e tyre. "Ish-kolegët tanë në Policinë e Kosovës kanë punuar deri kur kanë dhënë dorëheqje nga pozitat e tyre në vitin 2022. Disa kanë qenë edhe në pozita udhëheqëse, si komandant statcioni dhe shef i operativës. Në mesin e rreth 60-70 personave që kanë marrë pjesë aty, 3 ose 4 prej tyre kanë qenë ish-kolegë tanë", deklaroi ai.
Ngjarjet e 17 marsit 2004 nisën pas mbytjes së tre fëmijëve shqiptarë në lumin Ibër, në fshatin Qabër të Zubin Potokut. Një i katërt, që shpëtoi, sipas familjarëve kishte treguar se ata ishin ndjekur me qen nga fqinjtë serbë. Kjo çoi në protesta në të gjithë Kosovën, që eskaluan në dhunë. Sipas raportit të Sekretarit të Përgjithshëm të UNMIK-ut të 30 prillit 2004, humbën jetën 19 persona – 11 shqiptarë të Kosovës dhe 8 serbë të Kosovës –, ndërsa 954 të tjerë u plagosën.