Grupi i hakerëve Homeland Justice ka sulmuar më 10 mars 2026 sistemin IT dhe postën elektronike të Kuvendit të Shqipërisë. Në platformën Telegram, ata publikuan foto nga email-et e administratës dhe komunikime të brendshme të deputetëve, duke pretenduar se kanë akses prej muajsh në bisedat dhe korrespondencën e anëtarëve të Kuvendit.
Në mesazhin e tyre thuhet: “Të gjitha bisedat dhe korrespondenca e anëtarëve të korruptuar të Kuvendit gjatë muajve të fundit janë në duart e Homeland Justice. Ne jemi shumë më pranë jush sesa mendoni. A i strehuat vërtet ata vrasës dhe vrasës fëmijësh? Ne do të sigurohemi që kjo turp të mbetet me ju përgjithmonë.”
Sipas burimeve, janë publikuar komunikime të deputetëve Gazment Bardhi, Belinda Balluku, Edi Paloka dhe Damian Gjiknuri. Një postim tjetër paralajmëron se “së shpejti anëtarët e korruptuar të këtij parlamenti do të turpërohen për veprat e tyre të urryera”.
Stafi i Kuvendit raporton probleme me aksesimin në sistem. Disa deputetë kanë marrë email-e paralajmëruese: “Ky email vjen nga jashtë institucionit të Kuvendit të Shqipërisë. Ju lutemi, mos i klikoni link-et ose skedarët bashkangjitur, përveç rasteve kur e njihni burimin e emailit dhe e dini që përmbajtja është e sigurt.”
Autoriteti Kombëtar për Sigurinë Kibernetike ka njoftuar se ka ngritur grup pune për analizën e rastit dhe ekipet janë në terren. Burime nga Kuvendi pranojnë ekzistencën e sulmit dhe presin komunikim zyrtar. Ky nuk është sulmi i parë i Homeland Justice ndaj institucioneve shqiptare; ata kanë sulmuar më parë shërbime online si e-Albania në 2022. Një burim dyshon se pas grupit fshihen hakerë iranianë.