Ministrja e Ekonomisë dhe Inovacionit Delina Ibrahimaj u shpreh pas mbledhjes së Këshillit të Ministrave se sulmet kibernetike nga hakerat iranianë të grupit Homeland Justice nuk kanë shkaktuar dëme të pariparueshme në sisteme.
Ajo njoftonte se nuk janë marrë të dhëna dhe se infrastruktura e sigurisë kibernetike, e ngritur që nga sulmi i parë iranian vite më parë, është në nivel të lartë. «Ne nuk mund t’i ndalojmë dot sulmet kibernetike, por mund të monitorojmë dhe parandalojmë që të mos ketë dëme të pariparueshme», tha ajo.
Sa i përket sulmit ndaj AKSHI-së, ku raportohet vjedhje e të dhënave personale të qytetarëve dhe institucioneve, Ibrahimaj mohoi përdorimin e tyre për interes privat. Ajo vuri në dukje se nuk ka ende konkluzion zyrtar nga Prokuroria dhe Gjykata. «Fakti që të dhënat janë përdorur për interes privat është një opinion. Kur Prokuroria dhe Gjykata të dalin me qëndrim, do ta njohim», deklaroi ministrja.
Në të njëjtën mbledhje, Këshilli i Ministrave miratoi një projektligj të ri për sigurinë e të dhënave personale dhe mbrojtjen kibernetike, në përputhje me standardet e BE-së. Qeveria do të vazhdojë investimet në këtë fushë, duke theksuar se e ardhmja është dixhitale dhe sulmet përdorin gjithmonë instrumente të reja teknologjike.
Pretendimet e grupit Homeland Justice për goditje ndaj Gjykatës së Lartë dhe Prokurorisë së Përgjithshme janë rrëzuar nga institucionet.