Në kuadër të punimeve të Samitit të IV të Diasporës në Tiranë, ministri për Evropën dhe Punët e Jashtme, Ferit Hoxha, priti në një takim Zëvendëskryeministrin e Parë dhe Ministrin e Punëve të Jashtme dhe Diasporës së Kosovës, Glauk Konjufca. Gjatë takimit, palët vlerësuan rolin e diasporës si një aset strategjik dhe shprehën vullnetin për ta kthyer atë në një fuqi të organizuar.
Ministri Hoxha theksoi nevojën për një qasje të unifikuar në raport me diasporën, duke njoftuar se institucionet janë duke hartuar një strategji të përbashkët për periudhën 2026–2030. Ky proces synon harmonizimin e investimeve, inovacionit dhe angazhimin e talenteve shqiptare në një platformë të vetme.
Në takimin dypalësh, Hoxha dhe Konjufca diskutuan mbi riaktivizimin e mekanizmave institucionalë të përbashkët dhe përshpejtimin e projekteve kombëtare në fusha prioritare si:
- Ekonomia dhe infrastruktura
- Energjia
- Arsimi dhe kultura
- Mbrojtja dhe siguria
Zëvendëskryeministri Konjufca shprehu mirënjohjen për rolin e Shqipërisë në forcimin e subjektivitetit ndërkombëtar të Kosovës dhe mbështetjen për integrimin në BE, NATO dhe OKB. Nga ana e tij, ministri Hoxha theksoi se dhënia e statusit të vendit kandidat për Kosovën është një domosdoshmëri politike dhe strategjike, duke bërë thirrje që ky moment pozitiv në marrëdhëniet me Bashkimin Evropian të shfrytëzohet pa vonesa të mëtejshme.