Ministri për Evropën dhe Punët e Jashtme Ferit Hoxha njoftoi se pas Samitit të IV-të të Diasporës është nisur hartimi i Strategjisë Kombëtare të Diasporës 2026-2030 dhe planit të veprimit.
Në një postim në rrjetin social X, Hoxha tha se javën e kaluar u zhvillua një takim me Grupin Ndërinstitucional të Punës për të reflektuar sugjerimet dhe rekomandimet e marra gjatë dhe pas samitit.
Sipas ministrit, strategjia do të fokusohet në promovimin e investimeve, ruajtjen dhe zhvillimin e gjuhës, kulturës dhe identitetit kombëtar, si dhe në forcimin e bashkëpunimit institucional me komunitetet shqiptare jashtë vendit.
Hoxha theksoi se qëllimi është krijimi i mekanizmave për angazhimin e profesionistëve shqiptarë në diasporë dhe transferimin e njohurive, ekspertizës dhe inovacionit drejt zhvillimit të vendit.
Dokumenti do të bëhet publik në javët e ardhshme për konsultim të gjerë me qytetarët, organizatat e diasporës, ekspertët dhe grupet e interesit, me qëllim që të pasqyrojë nevojat e shqiptarëve kudo që jetojnë.