Qeveria shqiptare ka prezantuar për konsultim publik projektin e Strategjisë Kombëtare për Diasporën 2026-2030. Ky dokument strategjik synon të transformojë rolin e diasporës, duke e zgjeruar kontributin e saj përtej remitancave, drejt një përfshirjeje aktive në zhvillimin ekonomik, social dhe institucional të vendit.
Sipas planit të veprimit, Ministria e Financave në bashkëpunim me Ministrinë për Evropën dhe Punët e Jashtme do të hartojnë një paketë të posaçme fiskale. Kjo paketë parashikon ulje tatimore dhe stimuj për investimet në sektorët prioritarë, si dhe aplikimin e normave preferenciale të tatimit mbi fitimin për investimet në sektorë strategjikë.
Një nga risitë kryesore është ngritja e një sporteli të vetëm (one-stop-shop) për investitorët e diasporës. Ky shërbim do të ofrojë asistencë administrative të centralizuar, duke përfshirë:
• Regjistrimin e bizneseve;
• Aplikimin për leje dhe licenca;
• Procedurat fiskale.
Strategjia i kushton vëmendje edhe inovacionit dhe sipërmarrjes. Dokumenti parashikon krijimin e skemave të granteve për startup-et e krijuara nga diaspora, si dhe mbështetjen e inkubatorëve dhe akseleratorëve të biznesit. Përtej mbështetjes financiare, strategjia synon të ndërtojë partneritete midis institucioneve publike, universiteteve dhe sektorit privat, për të mundësuar transferimin e njohurive dhe ekspertizës profesionale.
Dokumenti gjithashtu adreson nevojën për përditësimin e Regjistrit të Diasporës dhe krijimin e databazave të profesionistëve, me qëllim strukturimin dhe forcimin e bashkëpunimit me shqiptarët që jetojnë jashtë vendit.