Ministri për Evropën dhe Punët e Jashtme, Ferit Hoxha, dhe Ministrja e Shtetit për Administratën Publike dhe Antikorrupsionin, Adea Pirdeni, nisën më 28 mars 2026 në Shkolën e Magjistraturës në Tiranë turin e dialogut “BE dhe Ti: Evropa fillon këtu”.
Sipas Hoxhës, ky tur synon të bisedojë mbi rolin e çdo qytetari për të bërë procesin e integrimit të prekshëm për të gjithë. Takimet nuk janë leksione, por bashkëbisedime me të rinjtë.
Ministri deklaroi se dialogu do të vazhdojë së shpejti me kryenegociatoren Dhuka dhe do të titullohet “EU and You, Europe Starts at Home”, e thënë shqip “BE-ja dhe Ti – Evropa fillon këtu”. Ai theksoi se integrimi fillon tek secili individ dhe nuk realizohet vetëm nga ministritë apo qeveria, por nga të gjithë bashkë.
“Integrimi është përgjegjësi e parë e ekipit negociator, e grupeve të tyre dhe e nëpunësve civilë, por edhe e një numri të gjerë aktorësh nga shoqëria civile, bota e biznesit dhe të gjitha fushat e veprimtarisë në këtë vend, të cilët kanë një rol dhe një kontribut të pazëvendësueshëm”, u shpreh Hoxha.
Ai shtoi se, nëse të gjithë kuptojnë procesin dhe japin kontributin e tyre, Shqipëria do të jetë e denjë për të qenë pjesë e Bashkimit Evropian. Hoxha theksoi se zgjerimi është një nga pesë prioritetet kryesore në Bruksel dhe kurrë më parë pas vitit 2004 nuk është folur me kaq sinqeritet e vendosmëri për të. Zgjerimi shihet si pjesë e rëndësishme e rindëmtimit të arkitekturës së sigurisë në BE, ndërsa interesat e Shqipërisë përputhen me ato të unionit.