Ministri për Evropën dhe Punët e Jashtme Ferit Hoxha mori pjesë në mbrëmjen përkujtimore të organizuar në Arqipeshkvinë Metropolitane Tiranë-Durrës në nderim të të Lumit Vladimir Gjika. Ai e përshkroi Gjikën si simbol të besimit, dinjitetit dhe qëndresës, si dhe si urë të rëndësishme kulturore dhe shpirtërore mes Shqipërisë dhe Rumanisë.
Në një postim në rrjetin social X, Hoxha vlerësoi lidhjet historike dhe kulturore mes dy vendeve. Ai kujtoi se në Rumani mori formë një pjesë e rëndësishme e Rilindjes Kombëtare Shqiptare. Sipas ministrit, patriotët shqiptarë atje artikuluan idealet e lirisë dhe pavarësisë, botuan libra e gazeta dhe mbajtën gjallë frymën kombëtare.
Hoxha theksoi kontributin e familjeve të mëdha shqiptare që lanë gjurmë në jetën politike, kulturore dhe shpirtërore të të dy vendeve. Ai vlerësoi rolin e diasporës shqiptare në Rumani për ruajtjen dhe përcjelljen e identitetit kombëtar ndër breza. Ministri shtoi se diaspora mbetet burim i çmuar energjie dhe dijesh për zhvillimin e Shqipërisë dhe për arritjen e së ardhmes evropiane të vendit.