Gjatë qëndrimit në Luksemburg, ministri për Evropën dhe Punët e Jashtme, Ferit Hoxha, zhvilloi një takim me ministrin e Shtetit për Çështjet Evropiane në Ministrinë e Jashtme Federale të Gjermanisë, Günter Krichbaum.
Në qendër të bisedimeve ishte rruga e anëtarësimit të Shqipërisë në BE dhe dinamika aktuale e zgjerimit të Unionit. Përmes një njoftimi në rrjetin social X, ministri Hoxha bëri të ditur se është diskutuar mbi mundësitë që ofron momenti i ri pas proceseve të zgjerimit.
Dy zyrtarët ndanë të njëjtin qëndrim lidhur me domosdoshmërinë e ruajtjes së një procesi të besueshëm, i cili duhet të bazohet në meritokraci dhe të shoqërohet me hapa konkretë drejt integrimit gradual. Sipas palëve, ky proces duhet të sjellë vendet kandidate më afër strukturave të Bashkimit Evropian, në përputhje me përparimin e tyre në reformat e ndërmarra.
Ministri Hoxha shprehu vlerësimin për mbështetjen e palëkundur të Gjermanisë për zgjerimin e BE-së dhe për anëtarësimin e plotë të Shqipërisë në familjen evropiane.