Ferit Hoxha, ministër për Evropën dhe Punët e Jashtme, vizitoi më 20 prill 2026 Luksemburgun, ku u prit nga zëvendëskryeministri dhe ministri i Jashtëm, Xavier Bettel.
Palët u ndalën në angazhimin e përbashkët për të thelluar bashkëpunimin në fushat ekzistuese kyçe, me fokus të shtuar te inovacioni, teknologjia dhe turizmi.
Në një postim në platformën X, ministri Hoxha theksoi mbështetjen e vazhdueshme dhe të vendosur të Luksemburgut për procesin e anëtarësimit të Shqipërisë në Bashkimin Evropian. Ai vlerësoi angazhimin e Bettelit për perspektivën evropiane të Ballkanit Perëndimor.
Biseda trajtoi hapat e ardhshëm të negociatave të anëtarësimit, duke nënvizuar rëndësinë e ruajtjes së momentit të zgjerimit me një proces të besueshëm, të bazuar në meritë dhe të drejtuar drejt një të ardhmeje të përbashkët evropiane.
Hoxha shprehu kënaqësi për shkëmbimin e ngrohtë dhe konstruktiv, duke rikonfirmuar marrëdhëniet e shkëlqyera miqësie dhe bashkëpunimi mes Shqipërisë dhe Luksemburgut. Ai përmendi dëshirën për të thelluar partneritetin, veçanërisht me një vizitë të ardhshme të Bettelit në Shqipëri.