Ish-ministri i Punëve të Jashtme dhe deputeti i Kuvendit të Kosovës, Enver Hoxhaj, ka reaguar pas zhvillimeve në procesin e integrimit evropian për vendet e rajonit. Përmes një deklarate, ai uroi Shqipërinë për avancimin në negociatat e anëtarësimit dhe Malin e Zi për mbylljen e dy kapitujve të rinj negociues.
Sipas Hoxhajt, sukseset e vendeve fqinje duhet të shërbejnë si thirrje për reflektim për institucionet e Kosovës. Ai vlerësoi se vendi ka humbur ritmin në procesin e integrimit, duke e krahasuar situatën e tanishme me atë të periudhës shtatë vite më parë, kur, sipas tij, Kosova gëzonte një perspektivë më të besueshme dhe mbështetje më të madhe nga partnerët ndërkombëtarë.
"Prej 3 vitesh Kosova pret që statusi i vendit kandidat të shqyrtohet, mirëpo kjo kërkesë ka mbetur në sirtarët e Bashkimit Evropian pa ndonjë zhvillim konkret," deklaroi Hoxhaj. Ai shtoi se, përderisa shtetet e tjera të rajonit po afrohen me Bashkimin Evropian, Kosova rrezikon të mbetet vendi i fundit në procesin e anëtarësimit. Ai bëri thirrje për rikthimin e vendit në agjendën evropiane përmes besueshmërisë dhe vizionit.