Një ngjarje e rëndë është shënuar mesditën e sotme në qytetin e Durrësit, ku një shtetas filipinez ka ndërruar jetë si pasojë e një goditjeje nga rryma elektrike. Viktima, 28-vjeçari me inicialet A.R., ishte punonjës i një firme private dhe po kryente detyrat e tij mbi një varkë që ndodhej në det.
Sipas njoftimit zyrtar, aksidenti ka ndodhur rreth orës 12:20 në lagjen nr. 1. I riu ishte duke përdorur një pompë për largimin e ujit nga varka kur, gjatë procesit të punës, ka rënë në kontakt me energjinë elektrike. Pavarësisht ndërhyrjes së menjëhershme, shtetasi filipinez nuk ka arritur t'u mbijetojë plagëve të marra.
Shërbimet e Policisë kanë mbërritur në vendin e ngjarjes dhe kanë nisur hetimet. Grupi hetimor po punon intensivisht për të sqaruar rrethanat dhe shkaqet e plota të këtij aksidenti tragjik në punë, ndërsa po vlerësohen të gjitha provat e gjetura në zonë.