Një ngjarje tragjike ka ndodhur të martën në fshatin Gremnik të komunës së Klinës, ku një person ka ndërruar jetë si pasojë e një vetaksidenti me mjet bujqësor. Sipas njoftimit zyrtar të dhënë nga Fadil Gashi, zëdhënës i Policisë së Kosovës për rajonin e Pejës, aksidenti është regjistruar rreth orës 14:55.
Bazuar në të dhënat policore, viktima ka humbur kontrollin e traktorit gjatë lëvizjes dhe është rrokullisur, duke pësuar lëndime të rënda trupore. Mjeku kujdestar, i cili ka mbërritur në vendin e ngjarjes, ka konstatuar vdekjen e personit.
Në vendin e ngjarjes kanë dalë njësitë kompetente policore dhe ekipet e mjekësisë ligjore për të kryer hetimet e nevojshme. Me urdhër të prokurorit, trupi i pajetë është dërguar për obduksion, ndërsa po punohet për zbardhjen e plotë të rrethanave në të cilat ka ndodhur aksidenti.
Përditësime
Policia e Kosovës ka bërë të ditur se viktima e aksidentit me traktor në fshatin Gremnik të Klinës është Ardian Kalludra, 42 vjeç, banor i këtij fshati.
Autoritetet kanë konfirmuar identitetin e viktimës që humbi jetën si pasojë e rrokullisjes me traktor në Gremnik të Klinës. Bëhet fjalë për Ardion Kalludra, ndërsa familja ka njoftuar se ceremonia e varrimit do të mbahet sot, në orën 19:00.