Një ngjarje e rëndë ka ndodhur paraditen e sotme në zonën bregdetare të Radhimës në Vlorë, ku një shtetase finlandeze rreth 30 vjeçe ka humbur jetën gjatë një ekspedite zhytjeje. Turistja, e cila ishte pjesë e një grupi, ka shfaqur komplikacione të rënda shëndetësore teksa ndodhej në afërsi të anijes së mbytur të njohur si Spitaliers.
Sipas informacioneve paraprake, turistja u ndihmua nga anëtarët e grupit, të cilët e nxorën në sipërfaqe dhe e transportuan me urgjencë drejt Spitalit Rajonal të Vlorës. Pavarësisht përpjekjeve të stafit mjekësor, 30-vjeçarja nuk arriti të mbijetojë dhe ndërroi jetë pas mbërritjes në spital.
Burime spitalore konfirmuan se së bashku me viktimën është dërguar për trajtim edhe një person tjetër që e shoqëronte. Ky i fundit ndodhet në gjendje të vetëdijshme dhe po merr ndihmën e nevojshme mjekësore.
Autoritetet policore kanë nisur veprimet procedurale për zbardhjen e plotë të rrethanave të ngjarjes. Ekspertiza mjeko-ligjore pritet të përcaktojë shkakun e saktë të vdekjes, ndërsa dyshohet se turistja mund të ketë pasur probleme me furnizimin me oksigjen ose komplikacione të tjera shëndetësore gjatë zhytjes.