Qeveria e Republikës së Kosovës ka zyrtarizuar vendimin për rritjen e pagës minimale, duke e ndarë në dy faza gjatë vitit 2026. Vendimi me numër 10/273, i datës 31 tetor 2025 dhe i nënshkruar nga kryeministri në detyrë Albin Kurti, përcakton pagën minimale 425 euro bruto duke filluar nga 1 janari 2026 dhe 500 euro bruto nga 1 korriku 2026, për punë të rregullt me orar të plotë.
Ky vendim hyn në fuqi me publikimin në Gazetën Zyrtare të Republikës së Kosovës dhe obligon institucionet përkatëse për zbatim të plotë:
• Ministrinë e Financave, Punës dhe Transfereve;
• Administratën Tatimore të Kosovës (ATK);
• Inspektoratin e Punës.
Rritja vjen pas diskutimesh të gjata me sindikatat e punëtorëve, të cilat kanë kërkuar përshtatje me inflacionin dhe koston e jetesës. Qeveria synon përmirësimin e mirëqenies së punëtorëve dhe forcimin e standardeve në tregun e punës.
Paga minimale në Kosovë deri tani ka qenë ndër më të ultat në rajon. Kjo rritje pritet të ndikojë në fuqinë blerëse të qytetarëve. Megjithatë, përfaqësues të sektorit privat kanë shprehur shqetësime për vështirësitë financiare të bizneseve të vogla dhe të mesme, duke kërkuar mbështetje shtesë nga Qeveria.
Përditësime
Organizatat sindikale mirëpritën vendimin për pagën minimale prej 425 euro nga janari 2026, duke e cilësuar si hap pozitiv drejt drejtësisë sociale.