Kryetari i Organizatës së Veteranëve të Luftës së Ushtrisë Çlirimtare të Kosovës, Hysni Gucati, është dërguar për trajtim mjekësor në Emergjencën e QKUK-së, pas incidenteve të ndodhura gjatë protestës së zhvilluar sot para objektit të Kuvendit të Kosovës. Protesta u organizua për të kërkuar procedimin dhe votimin në lexim të dytë të ndryshimeve ligjore për Dhomat e Specializuara dhe Zyrën e Prokurorit të Specializuar.
Situata në sheshin "Skenderbeu" dhe në rrugën "Agim Ramadani" u përshkallëzua kur protestuesit hodhën mjete piroteknike në drejtim të forcave të rendit. Në përgjigje, Policia e Kosovës ka përdorur gaz lotsjellës për të shpërndarë turmën. Si pasojë e përleshjeve, raportohet se gjendja shëndetësore e disa protestuesve është përkeqësuar, ndërsa është lënduar edhe të paktën një zyrtar policor.