Gjatë vizitës së tij në Tiranë, i dërguari special i presidentit amerikan për Partneritetet Globale, Paolo Zampolli, ka realizuar një sërë takimesh me përfaqësues të institucioneve sportive në vend. Paolo Zampolli u prit në një takim nga presidenti i Federatës Shqiptare të Futbollit (FSHF), Armand Duka. Gjatë këtij bashkëbisedimi, palët u përqendruan te roli i futbollit në diplomacinë sportive dhe forcimin e marrëdhënieve ndërkombëtare. Armand Duka e njohu të dërguarin special me zhvillimet në futbollin shqiptar, transformimin e infrastrukturës dhe përfaqësimin e Shqipërisë në nivelet e larta të UEFA-s dhe FIFA-s. Në vijim të vizitës, Paolo Zampolli inspektoi ambientet e kompleksit "Shtëpia e Futbollit", duke vlerësuar standardet e investimit.
Krahas takimit në FSHF, i dërguari i presidentit Trump u prit edhe nga presidenti i Komitetit Olimpik Kombëtar Shqiptar (KOKSH), Fidel Ylli. Fokus i këtij takimi ishte forcimi i partneriteteve ndërkombëtare në fushën e sportit dhe promovimi i Shqipërisë përmes këtij sektori. Gjatë kësaj vizite, Paolo Zampolli u njoh gjithashtu me projektin "Tirana Olympic City", një iniciativë e vlerësuar si mundësi për promovimin e sportit dhe krijimin e hapësirave të reja për të rinjtë.