Forcat e sigurisë në Ugandë kanë arrestuar Moses Mujurizin, i dyshuar për vrasjen e 38 personave dhe ngrënien e pjesëve të trupave të tyre gjatë periudhës 2010–2025. Arrestimi u njoftua nga shefi ushtarak i vendit, Muhoozi Kainerugaba, përmes një postimi në rrjetin social X. Sipas deklaratës së tij, Mujurizi dyshohet se ka vepruar në Masaka, Ibanda dhe Kazo.
Sipas raportimeve të mediave vendase, Mujurizi dyshohet se hynte natën me forcë në banesa dhe sulmonte viktimat me hanxhar. Raportohet gjithashtu se ka joshur gra me premtimin e një lidhjeje. Autoritetet po hetojnë nëse ka vepruar i vetëm apo ka pasur bashkëpunëtorë.
Të dyshuarit i atribuohet edhe një sulm i vitit 2013 në shtëpinë e një pastori në zonën e Masakës, ku u vranë pastori, bashkëshortja e tij dhe shtatë anëtarë të tjerë të familjes. Sipas mediave lokale, Mujurizi ishte arrestuar disa herë, por më pas ishte arratisur ose ishte liruar. Arsyet e lirimeve nuk janë bërë të ditura.
Më 28 shtator 2026, një grua u vra në rajonin e Masakës së Madhe. Sipas raportimit të Uganda Radio Network, pas këtij rasti i dyshuari u përball me akuza për vrasje dhe trafikim njerëzor. Ai u arrestua në mesin e tetorit. Hetuesit po shqyrtojnë edhe raste të tjera të personave të zhdukur në zonat ku dyshohet se ka vepruar, ndërsa policia ka sekuestruar prova nga banesa e tij.
Kainerugaba tha se Mujurizi do të dalë para drejtësisë dhe se do të kërkohet ekzekutimi i tij. Në deklaratën e cituar nga Periskopi, ai tha se autoritetet do ta gjykojnë publikisht dhe do ta ekzekutojnë. Megjithatë, akuzat ndaj Mujurizit duhet të shqyrtohen nga gjykata. Ai prezumohet i pafajshëm deri në një vendim gjyqësor të formës së prerë.