Agjentët e Shërbimit të Imigracionit dhe Doganave të SHBA-së (ICE) arrestuan në New Jersey shtetasin italian Andrea Morzetta, 72 vjeç, nën dyshimin për mashtrim zgjedhor dhe votim të paligjshëm në zgjedhjet federale amerikane. Sipas njoftimit të publikuar nga ICE në rrjetin social X, Morzetta dyshohet se ka votuar në katër zgjedhje federale, megjithëse si shtetas i huaj nuk kishte të drejtë vote.
ICE deklaroi se votimi i paligjshëm, kur kryhet me vetëdije nga persona që nuk kanë të drejtë vote, nuk mund të konsiderohet shkelje e thjeshtë administrative. Agjencia tha gjithashtu se administrata Trump synon të mbrojë integritetin e zgjedhjeve dhe të garantojë drejtësinë e procesit zgjedhor.
Arrestimi u krye në New Jersey, një prej shteteve që zbaton politika të ashtuquajtura “strehë”. Këto politika kufizojnë bashkëpunimin e autoriteteve vendore me qeverinë federale në zbatimin e ligjeve të emigracionit.
Rasti i Morzettës nuk është i vetmi i raportuar së fundmi. Një shtetas finlandez është arrestuar gjithashtu nga zyra e Filadelfias e Hetimeve të Sigurisë Kombëtare (HSI), strukturë hetimore e ICE-së. Ai dyshohet se ishte regjistruar për të votuar me synimin për të marrë pjesë në zgjedhjet e përgjithshme të vitit 2024.