Pas 27 vitesh pritjeje, familja e Idriz Rrecajt nga Llausha e Skënderajt ka marrë konfirmimin zyrtar për fatin e tij. Identifikimi është bërë i mundur përmes analizave të ADN-së në laboratorin e Hagës, pas zhvarrosjeve të kryera në lokacionet e varrezave masive në Kalludër dhe Jabukë të komunës së Zubin Potokut.
Lajmin e ka bërë të ditur djali i tij, Shpëtim Rraci, i cili përmes një postimi në rrjetet sociale njoftoi se familja është informuar zyrtarisht nga institucionet shtetërore. Idriz Rrecaj ishte një nga 23 burrat e zhdukur në prill të vitit 1999, të cilët njihen si pjesë e të ashtuquajturit “Grupi i Intelektualëve”.
Në total, nga procesi i zhvarrosjeve në zonën e Zubin Potokut janë konfirmuar identitetet e 3 personave. Familja e të ndjerit ka shprehur mirënjohje ndaj institucioneve të Kosovës dhe të gjithë personave të angazhuar ndër vite për zbardhjen e fatit të personave të zhdukur gjatë luftës, duke përcjellë mesazhin: “GJAKU NUK HUMB KURRË!”