Kryetari i Komunës së Vushtrrisë, Ferit Idrizi, në një intervistë për Ekonomia Online, pohoi se buxheti për këtë vit nuk është i mjaftueshëm për shkak të kërkesave të vazhdueshme në rritje.
Ai theksoi se është bërë një planifikim buxhetor solid për realizimin e objektivave dhe projekteve të parashikuara. “Buxheti asnjëherë nuk është i mjaftueshëm sepse kërkesat çdoherë janë në rritje. Megjithatë ne kemi bërë një planifikim buxhetor solid që mendojmë se do t’i realizojmë objektivat edhe projektet që i kemi planifikuar për këtë vit”, tha Idrizi.
Sipas tij, shumë projekte kanë mbetur jashtë listës për shkak se vitin e kaluar komunës i janë marrë tre milionë euro për kontratat kolektive të mësimdhënësve. “Na kanë mbetur bukur shumë projekte jashtë listës për arsye të kontratës kolektive... Vetëm vitin e kaluar na kanë marrë neve tre milionë euro për kontratën kolektive të mësimdhënësve”, u shpreh ai.
Idrizi vuri në dukje se pagesat nga përmbaruesit dëmtojnë buxhetin, pasi ato nuk janë të planifikuara dhe nuk kanë vijë buxhetore të veçantë. Këto pagesa prekin kodet buxhetore të investimeve kapitale. “Ditët në vijim do ta dimë saktësisht se ku do të preken projektet edhe ku do të mbesim keq”, shtoi ai.
Si zgjidhje, kryetari i Vushtrrisë propozoi themelimin e Grantit të katërt, siç është kërkuar nga Asociacioni i Komunave. Ky grant do të ndahej në mënyrë proporcionale bazuar në numrin e banorëve, duke shmangur ndërhyrjet e ministrive të linjës. “Granti i katërt me iu ndarë komunave, kishte me qenë një ndarje proporcionale në bazë të numrit të banorëve edhe më s’kishim pasur probleme asnjëherë”, deklaroi Idrizi.