Presidentja e Federatës Ndërkombëtare të Gazetarëve (IFJ), Zuliana Lainez, ka reaguar ndaj vendimeve të fundit të Komisionit të Pavarur të Mediave (KPM) për dënimin me gjoba të disa medieve në Kosovë. Nëpërmjet një mesazhi të publikuar nga Asociacioni i Gazetarëve të Kosovës (AGK), Lainez theksoi se këto masa ndëshkuese mund të cenojnë lirinë e shtypit dhe standardet demokratike.
Sipas IFJ-së, çdo formë rregullimi duhet të jetë në përputhje me rendin juridik ndërkombëtar dhe nuk duhet të përdoret për kufizimin e zërave kritikë. "Vendosja e sanksioneve ekonomike ndaj mediave që janë kritike është një formë censure. Demokracia ka nevojë për gazetari të lirë. Solidaritet me kolegët tanë", deklaroi Lainez.
Federata Ndërkombëtare të Gazetarëve është organizata më e madhe globale në këtë fushë, e cila përfaqëson rreth 600,000 profesionistë të medias përmes 187 sindikatave dhe shoqatave në më shumë se 140 vende të botës.