Instituti Hidrometeorologjik i Kosovës (IHMK) ka njoftuar për kushte të përkeqësuara meteorologjike sot në Kosovë, me erëra të forta në të gjithë territorin.
Era klasifikohet në nivelin e verdhë, që nënkupton rrezik të ulët, por kërkon kujdes të shtuar nga qytetarët. Shpejtësia e saj parashikohet të arrijë mbi 24 metra në sekondë (85 km/h), sidomos në lartësi mbi 1000 metra mbi nivelin e detit.
Rreziqet e mundshme
Këto erëra mund të shkaktojnë:
- Dëmtime në prona dhe pemë dekorative, duke përfshirë thyerje degësh;
- Probleme në transport;
- Dëmtime në pyje;
- Rreziqe për punimet në ndërtimtari, veçanërisht në lartësi;
- Ndikim në objekte të ekspozuara si shtylla elektrike, reklama dhe kulmet e ndërtesash.
Autoritetet këshillojnë qytetarët të tregojnë kujdes të shtuar, të ndjekin përditësimet e motit dhe të shmangin aktivitetet e panevojshme në hapësira të hapura gjatë periudhës me erë të fuqishme.
Përditësime
Komuna e Prishtinës ka lëshuar njoftim në Facebook për erëra të forta të pritura më 26 mars. Rreziku rritet në kantieret e ndërtimit me vinça, sipas autoriteteve lokale.