Komuna e Prishtinës ka njoftuar se nga mëngjesi i ditës së nesërme, bazuar në paralajmërimin e Institutit Hidrometeorologjik të Kosovës (IHMK), priten erëra të intensitetit mesatar deri të fortë. Këto erëra do të jenë më të theksuara në zonat lindore dhe ato kodrinoro-malore.
Drejtori për Siguri dhe Emergjenca në Komunën e Prishtinës, Lulzim Fushtica, ka folur për këtë situatë. Ai ka thënë se prognoza parashikon erëra të forta dhe të mesme të forta në të gjithë territorin e kryeqytetit, duke përfshirë edhe fshatrat. Erërat më të forta priten në pjesën e Gollakut dhe atë lindore të qytetit, por nuk përjashtohet mundësia për erëra të forta edhe në zonat urbane.
Fushtica ka njoftuar se ekipet e komunës kanë filluar punën që sot. Ato ndodhen në terren për të kontrolluar ndërtesat me potencial rreziku për rrëzim të fasadave ose pjesësh të kulmeve. Intervenimi i parë është bërë në mëngjes në Dardani, ndërsa planifikohen veprime të tjera në pjesë të ndryshme të qytetit.
Drejtori theksoi se qytetarët duhet t’i marrin këto paralajmërime pa panik, duke i konsideruar ato si pjesë normale të veprimtarisë së drejtorisë.