Drejtoria për Siguri dhe Emergjenca ka njoftuar se, si pasojë e erërave të forta gjatë ditës së sotme, ekipet emergjente kanë realizuar 17 intervenime në territorin e Prishtinës dhe Fushë Kosovës.
Në këto aksione morën pjesë Brigada Profesionale e Zjarrfikësve, ekipet e Drejtorisë për Siguri dhe Emergjencës, Ndërmarrja Publike "Gjelbër" dhe Drejtoria e Policisë së Kryeqytetit. Intervenimet u përqendruan kryesisht te largimi i kulmeve, llamarinave, reklamave, tjegullave, prerja e drunjve dhe trajtimi i rasteve të zjarreve.
Intervenimet u zhvilluan në zona të ndryshme si Dardania, Hajvalia, Bregu i Diellit, Mramori dhe Teneshdoll.
Rastet specifike të intervenimeve
- Dardania – largim i llamarines
- Rr. "Aziz Abrashi" – largim i reklamës
- Te Trafiku Urban – prerje e plepit
- Rr. "Mark Isaku" – largim i llamarines
- Rr. "Muharrem Fejza" – largim i llamarines
- Te ish-Kino ABC – largim i tjegullave
- Te Bosna, Kurriz – largim i llamarines
- Fshati Hajvali – intervenim në tela të rrymës
- Fshati Sinidoll – zjarr në bari të thatë
- Bregu i Diellit – largim i ulluqeve
- Dardania, Banesa Sociale – largim kulmi
- Rr. "Eqrem Çabej" – largim i llamarines
- Fushë Kosovë, rr. "Besa Besë" – largim kulmi
- Rr. "Shaqir Igrishta" – largim i dritareje
- Fshati Hajvali – tym në shtëpi
- Fshati Teneshdoll – zjarr në ushqim bagëtish
Autoritetet kanë bërë të ditur se dy intervenime vazhdojnë të jenë aktive dhe ekipet emergjente ndodhen ende në terren. Fatmirësisht, nuk raportohet për viktima apo dëme të mëdha njerëzore.
Përditësime
Drejtori Lulzim Fushtica konfirmoi 17 intervenime për erëra të forta në Prishtinë dhe Fushë Kosovë, nga ora 12:00 deri në 19:00. Këto përfshinin një rast në rrugën "Qmil Hoxha" për dru të rrëzuar, si dhe dëme në shtylla ndriçimi dhe elektrike.
Instituti Hidrometeorologjik nuk lëshoi paralajmërime të reja. Dëmet materiale janë të vogla dhe pritet të sanohen shpejt.