Instituti Hidrometeorologjik i Kosovës (IHMK) ka publikuar një raport ku thekson se përmbytjet në vend po bëhen gjithnjë e më të shpeshta. Kjo ndodh për shkak të kushteve meteorologjike, si intensiteti i lartë i reshjeve në periudhë të shkurtër dhe shkrirja e shpejtë e borës, si dhe faktorëve gjeomorfologjikë, përfshirë relievin ku shumica e ujërrjedhave formohen në viset e larta dhe rrjedhin me shpejtësi të madhe.
Sipas raportit, vetëm disa lumenj përmbyten më ngadalë për shkak të karakterit fushor, sipërfaqes dhe konfiguracionit të terrenit:
- Lumi Sitnica;
- Ibri;
- Rrjedha e mesme dhe e poshtme e Drinit të Bardhë.
Brenda periudhës pesëvjeçare, përmbytje me shkallë më të lartë janë regjistruar në vitet 2021, 2023 dhe nga 5-8 janar 2026. Këto të fundit kishin përmasa të krahasueshme me një periudhë kthyese hidrologjike prej 50 vitesh, veçanërisht në pellgun e Drinit të Bardhë dhe pjesën perëndimore.
Përmbytjet filluan në Rrafshin e Dukagjinit, më pas në zona qendrore si Rrafshi i Kosovës dhe Drenica, duke u shtrirë në pjesën më të madhe të vendit. Lumenjtë kryesorë e prekur përfshijnë:
- Drini i Bardhë (kryesisht rrjedha e mesme dhe e poshtme);
- Ereniku;
- Mirusha;
- Toplluha;
- Bistrica e Deçanit;
- Lumi Klina;
- Sitnica;
- Drenica;
- Ibri dhe degët e tyre.
Ngritja e shpejtë e niveleve dhe prurjeve të ujit ndodhi nga 5-8 janar 2026. Nga 8-10 janar 2026, mesatarisht në Kosovë ranë 41.3 mm reshje (l/m²). Për periudhën 1-10 janar 2026, sasia mesatare arriti 124.1 mm, pra 64.9 mm ose 50.6% më shumë se mesatarja e janarit për periudhën 1961-2024.