Instituti Hidrometeorologjik i Kosovës ka raportuar rritje të niveleve të disa lumenjve pas reshjeve të pandërprera, sidomos nga pasdita e 14 shkurtit 2026 dhe gjatë natës. Kjo situatë ka ndikuar veçanërisht në pellgun e Lepencit dhe Moravës së Binçës.
Sipas të dhënave më të fundit:
- Lumi Lepenc në vendvëzhgimin e Hani i Elezit ka arritur nivelin 2.93 metra dhe vazhdon të rritet.
- Lumi Morava e Binçës në Viti ka shënuar 1.33 metra dhe po rritet.
- Lumi Nerodime në Kaçanik ka arritur 0.82 metra (matje ora 08:00 më 15 shkurt 2026) dhe është në ngritje.
Instituti paralajmëron se këto ngritje mund të shkaktojnë vërshime lokale në zonat përreth këtyre lumenjve. Lumenjtë e tjerë në vend janë në rrjedha normale dhe nuk paraqesin rrezik për përmbytje.
Sasia e reshjeve të regjistruara:
- Brezovicë: 24.8 mm.
- Hani i Elezit: 36.8 mm.
Instituti Hidrometeorologjik i Kosovës u bën thirrje qytetarëve dhe autoriteteve lokale të jenë të kujdesshëm, veçanërisht atyre që jetojnë pranë lumenjve, dhe të ndjekin njoftimet e mëtejshme për situatën hidrologjike.