Me urdhër të ministrit të Brendshëm, Besfort Lamallari, shtetasja Ikballe Huduti është shpallur "person i padëshiruar" në Shqipëri për një periudhë prej 15 vitesh. Vendimi i është dërguar për zbatim Policisë së Shtetit dhe strukturave të Drejtorisë së Kufirit.
Sipas njoftimit zyrtar, masa është ndërmarrë pasi veprimtaria e saj vlerësohet si kërcënim për sigurinë kombëtare, rendin dhe sigurinë publike. Kryeministri Edi Rama reagoi publikisht duke publikuar fotografi të Hudutit gjatë protestave në Tiranë, krahas një fotografie të saj me ish-presidentin iranian Mahmoud Ahmadinejad. Kryeministri e cilësoi atë si personazh që predikon urrejtje dhe bën thirrje për kryengritje kundër qeverisë.
Në vitin 2020, Ikballe Huduti u arrestua në Kosovë për shkak të thirrjeve publike për hakmarrje ndaj SHBA-ve pas vrasjes së gjeneralit iranian Kasem Sulejmani.
Pas shpalljes së këtij vendimi, Huduti reagoi përmes rrjeteve sociale, duke u shprehur se nuk ka frikë dhe se prej kohësh është pozicionuar kundër padrejtësive. Ajo theksoi se preferon një vdekje dinjitoze para një jete me poshtërime.
Përditësime
Në dhjetor të vitit 2021, Gjykata Themelore në Prishtinë e shpalli të pafajshme Ikballe Hudutin për akuzat e 'shtytjes për kryerjen e veprave terroriste'. Huduti deklaroi se qëndrimet e saj bazohen në vlerat e 'shehidëve të Qerbelasë' dhe në veprën 'Qerbelaja' të Naim Frashërit.