Policia e Shtetit ka marrë vendimin për dëbimin e Ikballe Hudutit nga territori i Shqipërisë, me motivacionin se veprimtaria e saj përbën kërcënim për rendin publik dhe sigurinë kombëtare. Përveç dëbimit, asaj i është ndaluar hyrja në Shqipëri për një afat prej 15 vjetësh. Masa pason pjesëmarrjen e saj në protestat e zhvilluara prej gati një muaji në Tiranë, të cilat nisën si reagim ndaj projekteve turistike në Zvërnec dhe Sazan, por që më pas morën karakter politik.
Kryeministri Edi Rama ka reaguar lidhur me rastin, duke deklaruar se protesta është shfrytëzuar nga individë me lidhje ose simpati ndaj regjimeve që konsiderohen armiqësore me Shqipërinë dhe aleatët e saj perëndimorë. Rama e cilësoi Hudutin si "përfituese" dhe publikoi një fotografi të saj me ish-presidentin iranian, Mahmoud Ahmadinejad, të cilin e përshkroi si "kryeshërbëtor të ajatollahëve". Kryeministri shtoi se ajo kërkon hakmarrje ndaj Shteteve të Bashkuara për vdekjen e vëllait të saj.
Në vëmendje të opinionit publik janë rikthyer deklaratat e mëparshme televizive të Hudutit, ku ajo shprehej se kryeministri i Kosovës, Albin Kurti, është lideri i saj politik, ndërsa Mojtaba Khamenei, djali i liderit suprem të Iranit, është lideri i saj shpirtëror. Ajo deklaroi se ndihet krenare për të dy.
Nga ana e saj, Huduti ka reaguar në rrjetet sociale duke hedhur poshtë pretendimet për përfitime personale. Ajo theksoi se pjesëmarrja e saj në protesta ka pasur "motive patriotike dhe qytetare", duke u shprehur se si qytetare ka të drejtë të ngrejë zërin kundër padrejtësive.