Instituti i Kosovës për Drejtësi (IKD) ka kërkuar nga Këshilli Prokurorial i Kosovës shpalljen urgjente të konkursit për zgjedhjen e Kryeprokurorit të Shtetit.
Sipas IKD-së, Kosova funksionon pa një kryeprokuror të zgjedhur me mandat të rregullt tash e katër vite.
Hulumtuesi i lartë në IKD, Gzim Shala, në një intervistë për Ekonomia Online, tha se reforma në Këshillin Prokurorial të Kosovës sipas përbërjes së re është jetësuar dhe ekziston kuorum i mjaftueshëm për funksionim, ndonëse mungon vetëm një anëtar që duhet të zgjidhet nga Kuvendi i Republikës së Kosovës.
Ai theksoi se procesi për zgjedhjen e kryeprokurorit nuk është zhvilluar që nga tetori 2023, kur Presidentja e Republikës së Kosovës e ktheu vendimin e Këshillit Prokurorial.
"Tash po bëhen katër vite që kur Kosova është pa kryeprokuror të shtetit. Dhe tash aktualisht jemi në fazën kur reforma në Këshillin Prokurorial të Kosovës sipas përbërjes së re është jetësuar dhe nevojitet vetëm edhe një anëtar që të zgjidhet nga Kuvendi i Republikës së Kosovës. Megjithatë, ka kuorum të mjaftueshëm për të funksionuar. Që nga tetori i vitit 2023, kur Presidentja e ka kthyer vendimin, Këshilli Prokurorial nuk e ka zhvilluar përsëri konkursin", u shpreh Shala.
IKD vlerëson se mungesa e zhvillimit të konkursit të ri ka qenë rezultat i mosveprimit të Këshillit Prokurorial përgjatë kësaj periudhe.