Kryeprokurori i ri i Shtetit, Zejnullah Gashi, është paraqitur për herë të parë në mbledhjen e Këshillit Prokurorial të Kosovës, pasi u dekretua në këtë detyrë nga ushtruesja e detyrës së presidentit, Albulena Haxhiu, javën e kaluar. Gjatë fjalës së tij, Gashi vuri theksin te domosdoshmëria e rezultateve konkrete si e vetmja mënyrë për të forcuar besimin e qytetarëve në sistemin e drejtësisë.
Sipas kryeprokurorit, puna e prokurorëve duhet të mbështetet ekskluzivisht në profesionalizëm, integritet dhe prova të siguruara në mënyrë të ligjshme. Ai deklaroi se do të mbështesë çdo prokuror që punon me paanshmëri dhe guxim, por paralajmëroi se nuk do të lejohet askush të keqpërdorë autoritetin që i jep ligji.
“Prokurori duhet të flasë vetëm përmes punës. Besueshmëria në institucionin tonë nuk ndërtohet përmes deklaratave apo retorikës, por me profesionalizëm, integritet dhe rezultate konkrete”, u shpreh Gashi. Ai shtoi se gjatë mandatit të tij, sistemi prokurorial do të zhvillojë hetime më efikase, me përparësi të veçantë ndaj korrupsionit të nivelit të lartë, krimit të organizuar dhe çdo forme tjetër të kriminalitetit.