Kryeprokurori i Shtetit, Zejnullah Gashi, ka nxjerrë vendim për caktimin e prokurorëve nga Zyra e Kryeprokurorit të Shtetit si mbikëqyrës të Prokurorisë së Apelit, Prokurorisë Speciale dhe prokurorive themelore në Kosovë. Vendimi u njoftua më 4 nëntor dhe, sipas Zyrës së Kryeprokurorit të Shtetit, synon rritjen e efikasitetit, zbatimin e njëtrajtshëm të praktikave dhe respektimin e ligjshmërisë.
Prokurorët e caktuar do të mbikëqyrin menaxhimin dhe efikasitetin e prokurorive përkatëse. Ata do të ofrojnë mbështetje e këshillim dhe do të monitorojnë zbatimin e udhëzimeve dhe vendimeve të Zyrës së Kryeprokurorit të Shtetit.
Përgjegjësitë e tyre përfshijnë edhe mbikëqyrjen e trajtimit të lëndëve të vjetra dhe atyre me përparësi, duke respektuar pavarësinë funksionale të prokurorëve. Ata do të identifikojnë sfidat dhe problematikat institucionale, do të ndjekin zbatimin e shqyrtimit të detyrueshëm të lëndëve dhe do të marrin pjesë në kolegjiumet e prokurorive ku janë caktuar si mbikëqyrës.
Sipas njoftimit, vendimi synon forcimin e llogaridhënies dhe transparencës institucionale, si dhe përmirësimin e koordinimit dhe komunikimit të brendshëm për përmbushjen e prioriteteve dhe objektivave të Prokurorit të Shtetit.