Kryeprokurori i Shtetit, Zejnulla Gashi, deklaroi se lufta kundër korrupsionit dhe krimeve komplekse kërkon më shumë se ndjekje penale. Gjatë një takimi të organizuar nën përkujdesjen e Zyrës së Kryeprokurorit të Shtetit, UNDP-së, UNODC-së dhe Institutit të Bazelit për Qeverisje, Gashi vlerësoi nevojën për zhvillimin e hetimeve financiare dhe gjurmimin e pasurisë që buron nga veprimtaritë kriminale.
“Pasuria e përfituar në mënyrë të kundërligjshme duhet të gjurmohet, të sekuestrohet dhe të konfiskohet përfundimisht dhe të ardhurat e fituara në mënyrë të kundërligjshme t’i kthehen shtetit dhe të dëmtuarve që kanë pësuar nga veprimtaritë kriminale”, theksoi Gashi. Sipas tij, shkëmbimi i ekspertizës dhe praktikave profesionale midis vendeve pjesëmarrëse është thelbësor për rritjen e efikasitetit në rikthimin e aseteve.
Në këtë aktivitet morën pjesë:
- Kryeprokurorë dhe prokurorë nga Kosova;
- Përfaqësues të institucioneve ligjzbatuese të Republikës së Kosovës;
- Përfaqësues nga Prokuroria e Posaçme Kundër Korrupsionit dhe Krimit të Organizuar (SPAK) në Shqipëri;
- Prokurorë nga Prokuroria Kantonale e Sarajevës, Bosnje dhe Hercegovinë;
- Udhëheqës të Zyrave për Rikthimin e Aseteve nga Kosova, Shqipëria dhe Bosnje e Hercegovina.