Inspektori i Lartë i Drejtësisë (ILD) ka përfunduar hetimin disiplinor ndaj magjistrates Suela Dashi, gjyqtare pranë Gjykatës së Shkallës së Parë të Juridiksionit të Përgjithshëm Gjirokastër. Pas ankesave të paraqitura nga zëvendëskryetari i kësaj gjykate dhe dy qytetarë të tjerë, ILD ka kërkuar nga Këshilli i Lartë Gjyqësor (KLGJ) caktimin e masës disiplinore "ulja e përkohshme e pagës deri në 40 për qind për një periudhë jo më të gjatë se një vit".
Sipas raportit hetimor, shkeljet e konstatuara janë kryer me dashje dhe bien ndesh me ligjin nr. 96/2016 "Për statusin e gjyqtarëve dhe prokurorëve në Republikën e Shqipërisë". Shkeljet kryesore përfshijnë:
• Mungesa të pajustifikuara në detyrë për më shumë se tri ditë pune gjatë një viti.
• Mosparaqitja e kërkesës për heqje dorë nga gjykimi i çështjeve kur kjo është e detyrueshme sipas ligjit.
• Mosrespektimi i rëndë ose i përsëritur i legjislacionit procedural dhe material, shkelje të evidentuara edhe nga gjykata më të larta.
Në arsyetimin e tij, ILD vlerëson se veprimet dhe mosveprimet e gjyqtares kanë cenuar parimet e paanshmërisë, prestigjin e magjistratit dhe besimin e publikut te sistemi i drejtësisë. Po ashtu, raporti thekson se kjo sjellje krijon një precedent negativ për funksionimin e sistemit gjyqësor dhe paraqet rrezik për përsëritjen e praktikave të tilla nga magjistratë të tjerë.
Nga ana tjetër, në procesin hetimor nuk janë gjetur shkaqe objektive që të justifikojnë shkeljet e kryera. Megjithatë, si rrethana lehtësuese për gjyqtaren Suela Dashi janë konsideruar fakti që ajo nuk ka pasur masa disiplinore të mëparshme në fuqi, si dhe bashkëpunimi i saj gjatë zhvillimit të hetimeve.