Ish-presidenti i Shqipërisë, Ilir Meta, është nxjerrë përkohësisht nga qelia pas miratimit të kërkesës nga Prokuroria e Posaçme (SPAK) për të marrë pjesë në funeralin e babait të tij, Rexhep Meta. Ceremonia mortore zhvillohet ditën e sotme, më 2 qershor, në orën 12:00, në vendlindjen e të ndjerit, në fshatin Çepan të Skraparit.
Sipas procedurave të sigurisë, Meta po shoqërohet nga forcat e Policisë së Burgjeve gjatë gjithë kohës. Pas përfundimit të riteve të varrimit, ish-presidenti pritet të rikthehet në institucionin e paraburgimit. Autoritetet kanë miratuar leje edhe për ditën e mërkurë, më 3 qershor, kur familja do të presë ngushëllimet në Tiranë, në ambientet e hotelit Rogner, nga ora 09:00 deri në orën 21:00.
Ilir Meta ndodhet në paraburgim që prej tetorit të vitit 2024, nën hetim për veprat penale të fshehjes së pasurisë, pastrimit të parave dhe korrupsionit.