Ilir Meta, kryetar i Partisë së Lirisë, ka reaguar sot nga qelia për protestën e opozitës të zhvilluar më 24 janar para Kryeministrisë, ku pati tensione mes protestuesve dhe forcave të policisë.
Protesta zgjati rreth tre orë dhe u organizua nga Partia Demokratike dhe aleatë të saj. Në një postim në Facebook, Meta shprehu mirënjohje për mijëra qytetarë pjesëmarrës, duke thënë se ata tronditën themelet e asaj që ai e quajti Narkoshteti i Ramaduros dhe rikthyen shpresën për liri.
Ai theksoi se shqiptarët dhanë një mesazh të qartë force, demokracie dhe vendosmërie për mbrojtjen e lirisë, dinjitetit dhe Atdheut. Sipas Metës, protesta tregoi se populli është shumicë absolute përballë një pakice narko-mafioze, e cila u ka vjedhur dhe grabitur të ardhmen qytetarëve.
Meta u bëri thirrje forcave të policisë, të cilat i cilësoi narko-policë dhe shërbëtorë të kriminelëve, të ndalin menjëherë rrëmbimet mafioze dhe dhunën ndaj protestuesve paqësorë, si dhe ndaj gazetarëve. Ai paralajmëroi se kjo polici do të japë llogari një nga një për terrorin kriminal ndaj protestuesve.
Postimi përfundon me frazat: Përballje pa kthim! Ky regjim i kalbur ka mbaruar dhe i ka ditët e numëruara! FITORE!