Ilir Proda, Drejtor i Përgjithshëm i Policisë së Shtetit, shprehu vlerësim dhe mirënjohje të veçantë për Drejtorinë Vendore të Policisë Tiranë për finalizimin e operacionit të radhës, në vazhdën e operacioneve të njëpasnjëshme dhe të suksesshme kundër trafikimit të armëve të zjarrit nga Kosova drejt Shqipërisë, si dhe kundër shitjes dhe mbajtjes së tyre pa leje në Tiranë.
Operacioni “Barriera”, së bashku me goditjet e realizuara gjatë vitit 2025 dhe në fillim të 2026-ës, dëshmojnë për një punë të mirorganizuar, profesionale, hetimore dhe operacionale nga strukturat e DVP Tiranë. Këto veprime konfirmojnë bashkëpunimin e mirë ndërinstitucional, veçanërisht me Prokurorinë e Tiranës dhe partnerët ligjzbatues, si dhe bashkëpunimin e ngushtë me Policinë e Kosovës për parandalimin dhe goditjen e armëmbajtjes pa leje, trafikimit të lëndëve narkotike dhe paligjshmërisë tjetër.
Proda deklaroi se armët e zjarrit përbëjnë mjetin kryesor për kryerjen e veprave penale dhe rrezik të drejtpërdrejtë për jetën e qytetarëve dhe sigurinë publike. Parandalimi dhe goditja e tyre mbeten prioritet absolut i Policisë së Shtetit në shërbim të rendit, ligjit dhe qytetarëve.
Ai bëri të ditur se gjatë vitit 2026, goditja pa kompromis e armëmbajtjes pa leje, trafikimit të armëve dhe veprimtarisë kriminale të lidhur me to do të jetë një nga fokuset kryesore në të gjitha qarqet e vendit. Proda inkurajoi strukturat për të vazhduar punën me vendosmëri, profesionalizëm dhe përkushtim maksimal në shërbim të ligjit dhe sigurisë publike.