Aerodromi Hvardiyske, në qendër të Krimesë së pushtuar nga Rusia, është shndërruar në një qendër për lëshimin e dronëve, sipas imazheve satelitore të siguruara nga Radio Evropa e Lirë (REL). Ushtria ukrainase thotë se baza u identifikua për herë të parë si pikë lëshimi për dronë sulmues në mars të vitit 2025 dhe se përdoret pothuajse çdo ditë për sulme. Në rusisht, ajo njihet si Gvardeiskoye.
Imazhi satelitor i 11 tetorit nuk tregon avionë ushtarakë, por paraqet infrastrukturë të re dhe më të gjerë në aerodromin e epokës sovjetike. Në cepin jugperëndimor të bazës shihen dhjetëra objekte të paidentifikuara, të vendosura disa metra larg njëri-tjetrit në një hapësirë me bar. Vëzhguesit i lidhin këto objekte me veprimtarinë e lëshimit të dronëve.
Ukraina ka goditur depo dhe pika lëshimi të dronëve rusë në Krime, përfshirë objektet në Kepin Çauda dhe pranë Balaklavës. Sipas raportimeve, një sulm pranë Balaklavës e nxori objektin jashtë funksionit. Hvardiyske është goditur gjithashtu nga dronët ukrainas, por dëmet kanë qenë minimale.
Një banor i Krimesë dhe ish-oficer i ushtrisë ukrainase, i cili foli në kushte anonimiteti për Shërbimin e REL-it për Krimenë, tha se veprimtaritë në Hvardiyske janë shpërndarë në pjesë të ndryshme të bazës. Sipas tij, pika e lëshimit, zona e mirëmbajtjes dhe depot ndodhen në vende të veçanta. Ai shtoi se infrastruktura është relativisht e thjeshtë për t’u rikthyer në funksion pas një sulmi dhe se një pjesë e saj ndodhet në hapësirë të hapur.
Ish-oficeri tha se një magazinë nëntokësore, e ndërtuar në kohën sovjetike për ruajtjen e municioneve të avionëve dhe e vendosur rreth 15 kilometra larg bazës, mund të përdoret për të ruajtur sasi të mëdha dronësh sulmues. “Ka shumë gjasa që Shahedët mund të jenë fshehur atje”, tha ai, duke shtuar se depërtimi në objektin e fortifikuar mund të jetë i pamundur edhe me raketa.
Sipas burimit, vendndodhja e Hvardiyske në qendër të Krimesë, ku janë vendosur sisteme të mbrojtjes ajrore, e bën bazën më të vështirë për t’u goditur se pikat bregdetare. Dronët ukrainas që synojnë objektin duhet të përshkojnë rreth 100 kilometra mbi tokë, ku, sipas tij, gjasat për t’u rrëzuar janë më të mëdha.
Baza shërbeu fillimisht për aviacionin detar sovjetik dhe më pas për atë ukrainas. Pas aneksimit të Krimesë nga Rusia, ajo kaloi nën kontrollin e Forcave Ajrore dhe Hapësinore ruse, të cilat vendosën aty bombardues Su-24M dhe avionë sulmues Su-25SM, përpara se objekti të shndërrohej në qendër për dronë.