Një incident ka ndodhur gjatë ditës së sotme në Prishtinë, ku ish-deputetja Aida Dërguti u ndalua nga forcat e rendit derisa po kalonte rrugën për t’iu bashkuar protestës së organizuar nga Organizata e Veteranëve të Luftës së UÇK-së (OVL-UÇK). Policia pretendon se ndalimi erdhi për shkak të shkeljes së rregullave të qarkullimit rrugor.
Veprimi i policisë nxiti reagimin e protestuesve të pranishëm në sheshin “Skënderbeu”, të cilët kundërshtuan ndërhyrjen e forcave të rendit. Situata eskaloi në një përplasje mes qytetarëve dhe zyrtarëve policorë, ndërsa disa protestues shprehën hapur pakënaqësinë ndaj mënyrës së veprimit të policisë.
Në lidhje me ngjarjen, zëdhënësi i Policisë së Kosovës, Baki Kelani, konfirmoi se institucioni ka ndërmarrë masa administrative duke suspenduar një zyrtar policor të trafikut. Sipas tij, vendimi është bazuar në udhëzimet dhe procedurat e parapara për rastet kur zyrtarët janë të përfshirë në incidente të tilla.
Në anën tjetër, raportime të tjera sugjerojnë se numri i zyrtarëve të suspenduar është dy, të cilët janë pezulluar për një periudhë 48-orëshe derisa të shqyrtohen rrethanat dhe mënyra e veprimit të tyre gjatë përplasjes. Policia e Kosovës ende nuk e ka konfirmuar zyrtarisht këtë numër të dytë të të suspenduarve.
Përditësime
Drejtoria Regjionale e Prishtinës identifikoi zyrtarin policor të suspenduar si Haris Cekiq. Suspendimi i tij erdhi me rekomandim të këtij institucioni për shkak të mosbindjes së urdhrave zyrtarë. Dëshmitarët okularë raportuan se polici e tërhoqi zvarrë ish-deputeten Aida Dërguti gjatë përplasjes. Ngjarja ndodhi në ditën e tretë të protestave kundër dënimeve të Gjykatës Speciale ndaj ish-krerëve të UÇK-së.