Inspektorati Policor i Kosovës (IPK) ka rekomanduar suspendimin nga detyra të tre zyrtarëve policorë të stacionit “Alfa” në Prizren, pas dyshimeve për shkelje gjatë ushtrimit të detyrës zyrtare.
Sipas gjetjeve fillestare të hetimit, ngjarja ka ndodhur më 11 qershor 2026. Zyrtarët në fjalë kishin ndaluar automjete të paregjistruara dhe motoçikleta që qarkullonin në kundërshtim me dispozitat ligjore. Ndonëse fillimisht ishin iniciuar procedurat e duhura policore, zyrtarët dyshohet se nuk i kanë vazhduar ato, duke lejuar personat në fjalë të largohen pa u ndëshkuar.
Bazuar në këto veprime, IPK ka ngritur dyshime se sjellja e policëve përbën veprën penale të “marrjes së ryshfetit”, të sanksionuar sipas Kodit Penal të Republikës së Kosovës.
Departamenti i Hetimeve në IPK, në bashkëpunim me Prokurorinë Themelore në Prizren, po vazhdon hetimet për të sqaruar të gjitha rrethanat e rastit. Rekomandimi për suspendimin e përkohshëm është dorëzuar me qëllim që të garantohet paanshmëria e procesit hetimor dhe të shmanget çdo ndikim i mundshëm nga të përfshirët në këtë çështje.