Një incident ka ndodhur të mërkurën mbrëma brenda ambienteve të Stacionit Policor Jugu në kryeqytet, ku dy pjesëtarë të Policisë së Kosovës janë përfshirë në një konflikt fizik gjatë ushtrimit të detyrës zyrtare.
Inspektorati Policor i Kosovës (IPK) ka konfirmuar nisjen e hetimeve për këtë ngjarje. Zëdhënësi i këtij institucioni, Arbër Beka, bëri të ditur se nga veprimet fillestare hetimore ekziston dyshimi se zyrtarët janë përfshirë në një mosmarrëveshje, e cila ka degraduar në përleshje. Për këtë arsye, ndaj tyre është iniciuar rast për veprën penale "Sulm".
Si masë paraprake, IPK ka rekomanduar Policinë e Kosovës që t'i suspendojë dy zyrtarët e përfshirë deri në përfundim të procedurave hetimore. Rasti po trajtohet në procedurë të rregullt, në bashkëpunim të ngushtë me Prokurorinë Themelore në Prishtinë. Në një deklaratë për mediat, IPK theksoi se çdo veprim që cenon integritetin dhe profesionalizmin e Policisë së Kosovës do të trajtohet me seriozitetin më të lartë.