Tre zyrtarë të lartë nga Maqedonia e Veriut, koordinatori i grupit parlamentar të VLEN, Bekim Qoku, deputeti Adnan Azizi dhe zëvendëssekretari i përgjithshëm i Qeverisë, Hasim Murtezani, kanë pretenduar se janë ndaluar gjatë përpjekjes për të hyrë në Shqipëri përmes pikës kufitare të Qafë Thanës. Përfaqësuesit e VLEN-it deklaruan se ata u mbajtën për rreth një orë pa shpjegim zyrtar, pavarësisht se ishin të pajisur me pasaporta diplomatike, duke kërkuar sqarime nga shteti shqiptar mbi bazueshmërinë ligjore të këtij veprimi.
Në një reagim ndaj këtyre pretendimeve, burime nga pika kufitare e Qafë Thanës njoftuan se nuk ka pasur asnjë incident apo ndalim për tre zyrtarët në fjalë. Sipas autoriteteve të kufirit dhe migracionit në juglindje të Shqipërisë, grupi po udhëtonte me një shtetas të katërt, i cili nuk plotësonte kushtet për hyrje në territorin shqiptar për shkak të problemeve me dokumentin e identifikimit.
Sipas palës shqiptare, tre zyrtarët e VLEN-it mund të kishin vijuar udhëtimin lirshëm, por ata vendosën të kthehen prapa në shenjë solidariteti me personin që nuk u lejua të kalojë kufirin. Partia VLEN nga ana e saj vazhdon të kërkojë sqarime zyrtare nëse ndaj tyre ekziston ndonjë masë ndalimi hyrjeje, duke theksuar nevojën për transparencë në marrëdhëniet ndërinstitucionale.