Gianni Infantino, presidenti i FIFA-s, ka bërë të ditur se interesi për Kupën e Botës 2026 ka arritur nivele rekord. Në një intervistë për CNBC gjatë World Liberty Forum-it në Mar-a-Lago, ai tha se në vetëm katër javë janë regjistruar 508 milionë kërkesa për bileta, ndërsa në shitje janë rreth 7 milionë bileta.
Infantino theksoi se kjo kërkesë vjen nga tifozë në mbi 200 vende të botës dhe tejkalon çdo parashikim. Për krahasim, që nga Botërori i parë në vitin 1930 e deri sot, FIFA ka shitur gjithsej më pak se 50 milionë bileta.
Detaje të turneut
Kupa e Botës 2026 do të zhvillohet në Shtetet e Bashkuara të Amerikës, Meksikë dhe Kanada. Do të jetë edicioni i parë me 48 kombëtare dhe pritet të nisë më 11 qershor, me finalen më 19 korrik.
Procesi i shitjes së biletave
Për shkak të kërkesës së lartë, FIFA përdori sistem shorti për shpërndarjen e biletave në fazën e parë. Rezultatet iu dërguan tifozëve në fillim të shkurtit.
Për të tjerët, do të hapet një fazë shitjeje "Last-Minute" në prill, me parimin "i pari që vjen, i pari shërbehet", deri në fund të turneut.
Kritikat për çmimet
Kërkesa e madhe ka ardhur pavarësisht kritikave nga grupe tifozësh në Evropë dhe SHBA për çmimet e larta të biletave. FIFA i ka justifikuar ato me sistemin e çmimeve dinamike, që reflekton kërkesën e tregut në vendet nikoqire.
Përditësime
Gianni Infantino, president i FIFA-s, e quajti "absolutisht të pabesueshëm" numrin e kërkesave për bileta të Botërorit 2026. "Kemi marrë tashmë kërkesa për mbi 500 milionë bileta, saktësisht 508 milionë", tha ai, duke shtuar: "Në katër javë kemi marrë kërkesa që barazohen me një mijë vjet Botërorë".