Presidenti i FIFA-s, Gianni Infantino, reagoi pas polemikave për vendimin që lejoi sulmuesin Folarin Balogun të luante për Shtetet e Bashkuara në ndeshjen e fazës së 1/8 së finales të Kupës së Botës kundër Belgjikës. Reagimi erdhi pas raportimeve për një telefonatë të mundshme nga presidenti i SHBA-së, Donald Trump, në lidhje me këtë çështje.
Përmes një deklarate, Infantino pranoi se kishte zhvilluar një bisedë me kreun e shtetit amerikan, por sqaroi se i kishte shpjeguar këtij të fundit se çështja ishte në proces shqyrtimi nga organet e pavarura gjyqësore të FIFA-s.
“Organet gjyqësore të FIFA-s janë të pavarura. Ato funksionojnë në mënyrë autonome, zbatojnë Kodin Disiplinor dhe marrin vendime bazuar në rregulloret në fuqi dhe faktet konkrete”, deklaroi Infantino. Ai shtoi se diskuton rregullisht me krerë shtetesh mbi temat e Kupës së Botës, por theksoi se vendimmarrja mbetet përherë kompetencë e institucioneve përkatëse brenda organizatës.
Kreu i FIFA-s pranoi se, ndonjëherë, vendimet e komisioneve disiplinore mund ta befasojnë ose të mos përputhen me mendimin e tij personal, por nënvizoi se respektimi i tyre është thelbësor për besueshmërinë e garave sportive. Heqja e kartonit të kuq dhe lejimi i aktivizimit të Balogunit ishte kundërshtuar nga disa figura të futbollit dhe nga përfaqësues të Kombëtares së Belgjikës.