Shkalla vjetore e inflacionit në Kosovë arriti në 7.5 për qind në muajin prill, krahasuar me të njëjtën periudhë të vitit të kaluar. Inflacioni mujor ishte 1.1 për qind. Rritja më e madhe e çmimeve ndodhi te grupi i transportit, pasuar nga strehimi, uji, energjia elektrike, gazi dhe lëndët e tjera djegëse.
Eksperti i ekonomisë Safet Gërxhaliu tha se inflacioni është shndërruar në një sëmundje kancerogjene për aspektin ekonomik dhe social. Ai theksoi se Kosova ka të ardhurat më të ulëta për kokë banori në Ballkanin Perëndimor dhe se qeveria ka detyrimin të gjejë mënyra për të ulur efektet negative të inflacionit.
Ekonomisti Bashkim Mustafa paralajmëroi se inflacioni i lartë shkakton pasoja fatale, duke i bërë qytetarët më të varfër dhe bizneset të përballen me kosto të papërballueshme. Ai shtoi se kjo situatë ndikon në mungesën e investimeve dhe në vështirësimin e jetës së qytetarëve.
Sipas të dhënave të publikuara nga platforma WorldAtlas për vitin 2025, që bazohen në statistikat e Fondit Monetar Ndërkombëtar, Kosova renditet si vendi i dytë më i varfër në Evropë. Në krye të listës është Moldavia, ndërsa Shqipëria zë vendin e shtatë dhe Serbia vendin e tetë. Raporti thekson se ekonomia e Kosovës ka shënuar rritje mesatare prej rreth 4 për qind në pesë vitet e fundit, por papunësia e të rinjve mbetet e lartë me rreth 30 për qind.