Safet Gërxhaliu, ish-kryetari i Odas Ekonomike të Kosovës, ka deklaruar se zhvillimet e fundit në Lindjen e Mesme, përfshirë sulmet e Shteteve të Bashkuara të Amerikës dhe Izraelit në Iran, si dhe situatën në Gjirin Persik, do të kenë pasoja ekonomike për Kosovën.
Në një intervistë për Ekonomia Online, Gërxhaliu tha se këto ngjarje kanë ndryshuar botën në dimensione gjeostrategjike, politike, ekonomike dhe sociale. Ai nënvizoi se vendet e Gjirit Persik janë prodhuesit dhe eksportuesit më të mëdhenj të derivateve të naftës. Partnerët kryesorë të tyre, si Kina, India dhe Pakistani, janë të varur nga këto furnizime, çka çon në çrregullim të tregut global.
Gërxhaliu theksoi se bota nuk njeh distanca dhe ndikimet bartën shpejt në vende si Kosovën. Ai cilësoi situatën aktuale si normale, por paralajmëroi se pasojat reale do të shihen në të ardhmen.
Sa i përket Kosovës, ai vlerësoi ngërçin politik si njërën nga gjërat më negative për vitin 2026. Mungesa e stabilitetit politik, e vazhduar nga viti 2025, pengon angazhimin aktiv për të minimizuar pasojat e rritjes së çmimeve.