Mediumi italian Infodifesa.it, i cili raporton për çështje të mbrojtjes, shkruan për marrjen e komandës së KFOR-it nga gjenerali italian Roberto Vergori. Në raportim thuhet se kalimi i përgjegjësisë për Urën e Ibrit te Policia e Kosovës tashmë është i dukshëm në terren.
Sipas Infodifesa.it, bëhet fjalë për urën kryesore mbi Ibër, në Mitrovicë, si dhe për përfshirjen e Policisë së Kosovës në dispozitivin e sigurisë përreth Manastirit të Deçanit.
Raportimi citon gjeneralin turk Ozkan Ulutas, i cili, para largimit të tij, ka theksuar se “optimizimi nuk përbën transferim të mandatit të KFOR-it te Policia e Kosovës dhe as nuk përfaqëson tërheqje apo zvogëlim të angazhimit të NATO-s”.
Pavarësisht progresit të përmendur, Infodifesa.it shkruan se komanda e përshkruan situatën si “të brishtë”, me “potencial për tensione të reja”, veçanërisht në veri të Kosovës.