Fabrika e qumështit Vita, me seli në Istog, i është nënshtruar një procesi inspektimi nga Agjencia e Ushqimit dhe Veterinarisë (AUV). Kontrolli është kryer në kuadër të verifikimeve për sigurinë ushqimore dhe respektimin e standardeve ligjore në sektorin e përpunimit të qumështit.
Sipas AUV, gjatë kontrollit fizik u identifikuan mospërputhje me legjislacionin në fuqi. Agjencia konstatoi se operatori ushtronte veprimtari të përpunimit duke përdorur qumësht pluhur, vaj palme dhe lëndë të tjera ndihmëse, ndërsa nuk posedonte autorizim të veçantë për prodhimin e produkteve me bazë yndyrash bimore. Institucioni sqaroi se vlerësimet përfundimtare do të merren pas analizave laboratorike të mostrave të marra në terren dhe se, në këtë fazë, nuk është marrë asnjë masë për mbylljen e fabrikës.
Nga ana tjetër, drejtuesit e kompanisë Vita kanë kundërshtuar procesin, duke e cilësuar atë si të paligjshëm dhe si formë të trajtimit të pabarabartë ndaj prodhuesve vendorë. Përmes një reagimi, kompania theksoi se ka operuar për më shumë se 20 vjet sipas standardeve të larta dhe shprehu gatishmërinë për bashkëpunim me institucionet.
Ministri në detyrë i Bujqësisë, Armend Muja, ka deklaruar se kontrollet janë pjesë e mandatit të rregullt ligjor të AUV për të garantuar sigurinë e konsumatorëve. Ai nënvizoi se zbatimi i ligjit duhet të jetë i barabartë për të gjithë operatorët ekonomikë, pavarësisht pozitës së tyre në treg, me qëllim mbrojtjen e interesit publik.