Inspektorati Qendror i Mbikëqyrjes së Tregut, që vepron në kuadër të Ministrisë së Industrisë, Ndërmarrësisë, Tregtisë dhe Inovacionit, ka zhvilluar një aksion të gjerë inspektimesh në të gjithë territorin e Republikës së Kosovës.
Aksioni ka filluar gjatë javës dhe vazhdon në prag të festës së Bajramit. Qëllimi kryesor është verifikimi i çmimeve, kontrolli i flamujve të origjinës së produkteve si dhe saktësia e deklaracioneve të vendosura për konsumatorët.
Inspektorati thekson se mbetet i përkushtuar në mbrojtjen e konsumatorëve nga praktikat e padrejta tregtare dhe çdo veprim që bie ndesh me legjislacionin në fuqi. Përmes këtyre masave synohet garantimi i transparencës në treg dhe krijimi i një mjedisi të drejtë e të besueshëm për qytetarët.
Ndaj operatorëve ekonomikë me shkelje ligjore janë ndërmarrë masa ndëshkuese në përputhje me dispozitat ligjore.
Aksioni do të vazhdojë edhe në ditët në vijim për të siguruar respektimin e të drejtave të konsumatorëve dhe funksionimin e rregullt të tregut sipas standardeve të përcaktuara.
Përditësime
Inspektor Xhemajl Jashari deklaroi në emisionin 'tre8tre' të KTV-së se konsumatorët kanë ankesa specifike për ngritjen e çmimeve të produkteve të ëmbëlsirave. Ai theksoi fokusin në përputhjen e çmimit në rafte me arkën, ndërsa numri i ankesave nga konsumatorët është rritur.