Inspektorati Qendror i Mbikëqyrjes së Tregut, në kuadër të Ministrisë së Industrisë, Ndërmarrësisë dhe Tregtisë, ka realizuar një aksion inspektues të gjerë në bashkëpunim me Policinë e Kosovës, Administratën Tatimore të Kosovës dhe Inspektoratin Qendror të Punës. Aksioni u zhvillua në të gjithë territorin e Kosovës.
Qëllimi kryesor ishte sigurimi i respektimit të standardeve ligjore, mbrojtja e konsumatorëve, garantimi i konkurrencës së ndershme në treg si dhe verifikimi i përmbushjes së obligimeve ligjore nga subjektet ekonomike. Gjatë kontrollit u inspektuan 69 subjekte ekonomike, me fokus në sektorin e hotelerisë dhe turizmit, veçanërisht motelet dhe vilat.
Si rezultat, inspektorët kanë vendosur mbylljen e përkohshme të 26 subjekteve ekonomike për shkak të mosregjistrimit të bizneseve dhe mungesës së pëlqimit ose aktvendimit për plotësimin e kushteve minimale teknike. Ndaj operatorëve ekonomikë që vepronin në kundërshtim me legjislacionin në fuqi u shqiptuan 27 masa ndëshkuese.
Inspektorati ka njoftuar se, në bashkëpunim me institucionet e tjera, do të vazhdojë me aktivitete të ngjashme inspektuese për të forcuar sundimin e ligjit dhe për të krijuar një mjedis të sigurt për zhvillimin e veprimtarive ekonomike në Republikën e Kosovës.